Zoroaren mozkorra

 

Kamioitik kajara,

ibai oliotuaren ondoan;

kajatik poltsara,

haize kutsatuaren kolkoan;

poltsatik eskura,

zarataren kontziertoan...,

eta murmur dardartia

irudimenean,

ideia ta musikaren eztai

parnasoan jai,

etorri zoro mozkortia

barnean,

iraultza bezela,

nahasi-mahasian,

parnasoko iturrian

olerki-zizela

zorrozten,

esnea ta patatak biltzen,

saldu ta erosi

eta bizi...,

markatu,

supermerkatu,

nazionalak,

multinazionalak,

arranoen gisa,

ta pobreen prisa

ta tripalak

behera, gora,

eskutik ahora

platanoak,

oiloak,

piperra ta tomatea,

txokolatea,

kanpora ta barrura,

mingotsaren gozoan

salerosketaren ituxura

zementozko inurripiloan...,

eta numeroak eta kontuak,

hitzak eta letrak,

sagarra ta madaria,

legatza ta aragia,

aza,

kalabaza,

arana...,

hiriko

makinen

ritmo

matematiko

arlojutuen

hurakana...,

esklabo teknikoen

materia

izpiritu

bihurtu

da...,

«¡Jebo!»,

esan dio

erdaraz

(erdalduna bakarrik da jebo

euskaraz)

eta bost hogerleko

ta ehun pezeta,

urdai-azpiko

ta gaileta,

administrazioaren

engranajea,

sindikatoen

katea,

ekonomiaren

palankak,

estrukturen

erreforma,

horma ta horma,

hilargian hankak

lurpean burua,

astronauten abiada

urratuz zerua...!

«Zu, lagun,

gure estomagoa...».

Adiskidetasun

abstraktoa!

Simaur balde

utopikoaren

betiko galde...,

elkarrizketa

ta banketa...,

eta goizalde

batez ihardespen

faltso talde.

Gosea, gosea, gosea,

multinazionalen ondorea.

Arto, gari,

baratxuri

ta porrua,

tanke ta grua...,

bolkanaren gainean

egon ezinean

(batuago,

baina ez urbilago;

gehiago

baina ez hobeago)

oxigenorik gabe...,

eta jaun ta jabe

astronauten zeruan

arrano zapaltzaileak

eta behean,

nora ezean,

zapalduak,

lutuak,

gurina,

pipermina,

txitxarro ta sardina...,

eta zakurren eboluzioa

bildotsen erreboluzioa...,

«Apur dezagun arraultza

ta gora iraultza!

Estrukturak aldatu

ta gosea kendu,

gosea, gosea, gosea,

multinazionalen ondorea».

Eta, eta, eta...,

merkatu,

supermerkatu,

nazionalak,

multinazionalak...,

eta beti berdin,

pobreen tripalak,

alperreko ahalegin,

hilargian ezin

arnasarik hartu...,

eta

ideia

ta musika

dibortziatu.

 

 

© Mikel Zarate

 

 

"Higidura berdez" liburua

"Mikel Zarate - Lan guztiak" orrialde nagusia