Hor daude...

 

Hor daude

oraindino ere

Mesopotamiako ziguratak,

Egiptoko piramideak,

Yukatango tenploak

ta Txinako arresia

egin zituzten pioiak.

Hor daude

oraindino ere

Atenasko Partenon,

Erromako Coloseo

ta Espainiako Escorial

egin zuten pioiak.

Hor daude

oraindino ere

katedralak,

jauregiak

ta zerurainoko etxe haundiak

egin zituzten pioiak.

Hor daude

oraindino ere

eguzkiak

eta lanak

zapalduriko pioi gazteak

eta zaharrak.

Hor daude

betiko izardi ta egarriaren

berdintasunean,

betiko jauntxokeria indartsuaren

joputasunean,

ni Algortan,

orain urteak,

pioi izan nintzeneko lagunak.

Hor daude...

 

 

© Mikel Zarate

 

 

"Higidura berdez" liburua

"Mikel Zarate - Lan guztiak" orrialde nagusia