Patuaren ziztada

 

Hiru musker lirain

Euskal Herriko eguzki berdetan,

hiru musker ezain

euskal nekazarien haserretan.

 

Zizt-zazt,

dsa-dsa-dsa,

sasi zokoan

babesa.

 

Hiru musker dardarti

larre ondoko sastraka guritan,

hiru musker ausarti

makilen danbada gogor gorritan.

 

Zizt-zazt.

dsa-dsa-dsa,

nire kolkoan

babesa.

 

Hiru musker ongile

nire kolkoaren aterpe berotan,

hiru musker gaizkile

euskal ipuinen ikara itotan.

 

Zizt-zazt,

dsa-dsa-dsa,

nire gogoan

babesa.

 

 

© Mikel Zarate

 

 

"Etorriaren zorabioz" liburua

"Mikel Zarate - Lan guztiak" orrialde nagusia