|
Dendako leihotik
DENDAKO LEIHOTIK...
Dendako leihotik bizitzaren liparrak pasatuz doaz ikastolara berandu heltzen den gaztea lan egitera doan heldua egunkaria irakurtzen duen zaharra bere amodioa erakusten duen bikotea eta neska bila dabiltzan morroiak tabernara doan langabetu etsitua goxokiak jaten dituen umetxoa galduta dabilen turista diru eske datorren txiroa eta akordeoi urrun baten notekin aldentzen dena langileen hamaiketakoa eta kaleko erreginei egindako txistuak ezkonduen betiko ostera eta haizea eta goizeko izpiak eta arratseko ilunak eta gau laiotza etengabe pasatuz doaz dendako leihotik.
Aiztoak zauritu nau abisatu barik ebaki dizkit eskuak zergatik zigortzen nauzu era honetara? eskuak baino ez naizela bazenekien eskurik gabe ezer ez naizela ezindua utzi nauzun arren denborak orbainduko ditu zauriak nire lanarekin jarraituko dut egun gutxitan soilik odolik ez darien zauriak sendagaitzak dira.
Dendaria poltsak irekitzen dabilen artaziei begira bere hiltzaileen bisaiak ikus ditzake altzairuaren ņirņirrean gaur laguntzen dion ahoak, bihar hil egingo duela badaki egunero txanponak aldatzera etortzen diren bi eskaleak betiko moduan sartuko dira egunen batean dendako gauzarik ezkutuena eskatu eta bizkarra erakustean artaziak kaxoitik aterako dira batek dirua ebatsiko du besteak, ordea, hango bizitza ziztrina altzairuaren musua ez du sentituko agian min laburra eta sakona heharbada edari hotzen gainean eroriko da etzanda iraungo du hurrengo bezeroa heldu arte lurrean eroriko dira artazi errudunak borreroa eta kondenatua elkarren ondoan beste baten eskuak traidore bihurtuko dute adiskide izan zena ez dira bueltatuko eskaleak truke bila ezta artaziak poltsak irekitzen ere bizitza ziztrineko beste dendari bat erduko da egunero zoluko orban gorria ikuzten saiatuko dena.
Larunbateko gauez jendez beteta daukat denda aurki mozkorrak helduko dira pazientziazko geruza jantzi beharko koadrilarekin sartu zara motxila dendan gordetzeko erregutuz nola ukatu hain fabore erraza neure soak lagundua barrura zoaz erostekotan jendearen artean ezkutaturik poltsikoratzen duzu ez ordaintzea erabaki duzuna ez nukeen ikusi nahiko engainu hutsa nahiago izan nukeen baina begiek oraindik ere ez didate gezurrik esaten zergatik zeu izan behar zinen? horrela eskertzen didazu mesedea? eskatu ahal zenidan hurrengo egunean ordainduko zenidala esan zenezakeen neure eguberriko oparia izan zitekeen baina biok badakigu engainua ez dagoela onartzerik eta salatu behar zaitut isilik hurbiltzen zatzaizkit tinko begira erruren arrastorik gabe ordaindu nahi duzuna erakusten diskretua izan nahi dut ezkutatzen duzuna kobratzerakoan jendez beterik dago denda eta ez zaitut lotsatu nahi denoi bigarren aukera eskaini behar zaigula irakatsia naiz baina zertan ari naizen galdetzean arbuiatu egin didazu ukatzen baduzu ere zure masailetako koloreak egia esan du dendako jendea isildu egiten da guri begira dago auskalo zer entzuteko asmotan poltsikoa irekitzeko eska niezazukeen baina ez zaitut bezeroen ikuskizun doan bihurtu nahi lapurketa txikia da eta niri ez didate gutxiago ordainduko sinestu nahi nuke ez duzula errepikatuko hemen ez behintzat gaua luzea izango da hasi besterik ez da eta kutxatik pasatzeko ilara luzeegia da ez dagokit niri poliziarena egitea ordubete barru poltsa bila itzuli beharko zara ziur ez didazula begiratuko arestian bezain tinko zuk zeuk aukeratu duzu zigorra.
Gaurko eguna hustua tokatu zait betiko esperantzaz ireki dut haren ontzia baina ezer ez zegoen niretzat gordeta ontzi hutsarekin konformatu beharko naiz bihar arte ez bainaiz berri bat jasotzekoa edukina ez daukadanean ontzia erabiltzen ikasi beharko nuke zaramara bota beharrean egun gehiegi hustu etortzen baitira egunez dago osatuta bizitza eta bizitza gehiegi zaramara botatzen ikasi ditut neurea ere haiekin bil dadin.
Dendako leihotik
|
