HILTZAILEA IHES

 

   Ihes doa hiltzailea, ihes

itzal mozkorra bezala, trakets.

 

   Hilargiak arraskatu du

odolaren ustela,

ilunak pekatua

mendiei salatu.

 

Hiltzaile gizajoa

puñala,

odola

eskutan duela

izuturik doa.

Odolezko madarikazioz,

gauaren biraoz

itzalak esaten dio:

zer egin duk

—adiskide, lagun—

herio horren truk

zertan haiz errudun?

 

Berak du erantzun;

denak zarete gaizkile,

kriminal,

hiltzaile,

denak nonbaitean

—noizbaitean—

norbait hil duzue!

 

1969