Sonetoa 5

 

Bisutsak bere begi lausotuetako arrabiazko malkoak

desitxuratzen dituenean, etzazue, mesedez, bortxatu

otso zahar nekatua, etxeruntzko bidean zauri zornetu

haiek mauka daramatzanean, haurraren berotasunak

 

xurga diezazkion galtzaile den ororen menpekotasun

latzaren ametsetako munstroen azal labainkor leunak,

ametsak eta amets ezak nahasiko lituzken lilura ilun-

argiak mirestarazi ditzan bere antzinako egunen hatsak,

 

sortutako negarrak gal ez daitezen urrunera goritu

berrian, ez ditzan irentsi bakardadearen burko itsusiak,

ez daitezen bere errai urdinetako iturburuak pozoitu,

 

ez itzazue, beraz, lora zitzaketen amodiozko masustak

gerizarik gabeko haizearen soinu lizunez uxatu,

etxeruntz baitoa otsoa, atseden bila, arrastaka oinak.