EGONARRI SUKARTSUA

 

 

1.

 

Ene baitako

            altzariak zeinu isilez

                    albaintzen ohi diharduzun

                               itzal moduko hori,

                    zirkulu zentrokidetan barna beti

                            gogoeta-hausnar-etenka

                                    ohi narabilazuna:

 

                                            Zu zaitut, ala?

                                               ... ... ...

                            Ez dizut ongi etorririk opa,

                               bixitzau jatan leguna,

                                   baina zatozkeenean

                                        nola ote nagokeen,

                                horrek kezkatzen nau gehiena,

                                eta zure etorreraren nolakoak

                                        ere bai, noski.

                           (Oso ongi ditut ulertzen-eta

                            katolikoon errezuak, nunc et in hora)

 

 

2.

 

Bil nadin arnasara, nolanahi ere den:

 

     Erne. Begira. Hats.

     Huts. Hats huts. Hutsaren hats hartzea.

     Besterik zer?

              Zurrunbiloa kaosa

     Ikasi beharko larriduratik honantz arnasa hartzen.

     Beharbada ez da

              dirudien bezain alferrikakoa.

              Hitz-hausnar hauskara.

              Isiltasunaren xuxurla.

     Ez du inork erraza denik esan.

              Bizitza bete saialdi bazik.

              Oinazea haustea, hots, hustea.

 

                      Agian.Arnasarekin batera

                                    begirada ere

                                             zaharberri liteke.

 

 

3.

 

Errepara diezaiodan, beraz,

        arrastiriak suturiko hostailari

        galsoro larrainduen distira geldoari

               hainbat belaunaldiren izerdien izardiari...

 

                (Larrazken erraten ote zioten udazkenari

                      duela berrehun urte

                          Orbaibar bazter honetan?)

 

                (Beharbada. Ez baitzen oso apartekoa,

                          nahiz eta bai aspaldiagokoa,

                                  Joan de Amendux hura:

                         Nigar begi bapederak bere aldias oroiturik,

                             1567 urtean,Tafallakoa omen)

 

                                                          ... ... ...

 

Horra, baina:

            bost minutuz ere ezin eutsi izan diot begiespen hutsari,

                  liburu-zita(I)etara gabe:

                  amor fati, barre ere begi ene begiak

                  azken belaunaldi liburujaleko kidea

                                           naizelako harrotasunez.

 

 

4.

 

Aldatzear da eguraldia.

 

 

     Ihesean dabil tximeleta,

     euri-mehatxukor zerua ageri.

          Makalen abaroan

          ur-murmurio etena,

         laster zurrunbiloz ozengai.

     Ene larria lo datza

               hurbil den ekaitzari soraio.

 

                        ... ... ...

 

                        Heldu da euritea

              hosto mardulegien isiltasun horiztatua mezulari.

              Nagitasun bihurtu da arestiko (hain arestiko ere!)

                        narotasun hutsala.

 

                        ... ... ...

 

              Ziri-zara. Euria ari du, Zirri-zarra,

              Isila nigan. Mintzo oro lozorroan.

              Ziri-zara. Ziri zaidana orain bare.

 

              Gereziondo erantziak begi aurrean:

                haizeak daramatza hegan aleak

              euri lerdenaz blaitzen ari makalak

                    erreka-erreten apalean.

                Maite dut isil-bazter naro hau.

              Olleta. Orbaibar Valdorba. Nafarroa.

              Agramondar setiatuen istorio zaharrak

              elestatzen dituzte ametz egartsu aseek.